Rannsókna- og fræðasetur Háskóla Íslands á Vestfjörðum, Markaðsstofa Vestfjarða og Atvinnuþróunarfélag Vestfjarða stóðu fyrir framkvæmd könnunar á ferðamönnum til Vestfjarða sumarið 2010. Framkvæmd könnunarinnar var á þann hátt að Atvinnuþróunarfélagið sá um dreifingu spurningalista og kom henni fyrir á upplýsingamiðstöðum á Hólmavik og Ísafirði, ferðaþjónustufyrirtækinu  Borea Adventures, í Breiðafjarðarferjunni Baldri, Kaffi Norðurfirði, Hótel Flókalundi, Hótel Ísafirði og Eddu hótelinu á Ísafirði. Farþegar skemmtiferðaskipa og börn yngri en 18 ára voru ekki með í þessari könnun.
Könnunin er endurtekin frá árinu 2008 og 2009, en þá stóðu sömu aðilar að verkefninu og er samanburð á milli áranna að finna í skýrslu fyrir árið 2010.
Rannsóknin var gerð i þeim tilgangi að fá mynd af nokkrum grundvallaþáttum sem nauðsynlegt er að hafa í huga við skipulag og uppbyggingu ferðaþjónustu á Vestfjörðum og gefa niðurstöðurnar ákveðna mynd af því hvernig ferðamenn koma til Vestfjarða, hvernig ferðahegðun þeirra sé, hvaða þjónustu nýta þeir, hver er upplifun þeirra af svæðinu og svo framvegis.
Könnunina má sjá á vef Atvinnuþróunarfélags Vestfjarða.

Alls greiddu 83.531 atkvæði í kosningum til stjórnlagaþings sem er 35,95% kosningaþátttaka. Um 1100 atkvæði voru ógild. Hér koma upplýsingar um hversu mörg atkvæði þingfulltrúar fengu sem fyrsta val kjósenda.

1. Þorvaldur Gylfason prófessor 7192 atkvæði sem fyrsta val
2. Salvör Nordal forstöðumaður Sifræðistofnunar HÍ 2.842 sem fyrsta val
3. Ómar Þorfinnur Ragnarsson fjölmiðlamaður 2.440 atkvæði sem fyrsta val
4. Andrés Magnússon læknir 2.175 atkvæði sem fyrsta val
5. Pétur Gunnlaugsson lögmaður og útvarpsmaður 1.989 atkvæði sem fyrsta val
6. Þorkell Helgason stærðfræðingur 1.930 atkvæði sem fyrsta val
7. Ari Teitsson bóndi 1.686 atkvæði sem fyrsta val
8. Illugi Jökulsson blaðamaður 1.593 atkvæði sem fyrsta val
9. Freyja Haraldsdóttir framkvæmdastjóri  1.089 atkvæði sem fyrsta val
10. Silja Bára Ómarsdóttir alþjóðastjórnmálafræðingur 1.054 atkvæði sem fyrsta val
11. Örn Bárður Jónsson sóknarprestur 806 atkvæði sem fyrsta val
12. Eiríkur Bergmann Einarsson dósent í stjórnmálafræði 753 atkvæði sem fyrsta val
13. Dögg Harðardóttir deildarstjóri 674 atkvæði sem fyrsta val
14. Vilhjálmur Þorsteinsson stjórnarformaður CCP 672 atkvæði sem fyrsta val
15. Þórhildur Þorleifsdóttir leikstjóri 584 atkvæði sem fyrsta val
16. Pawel Bartoszek stærðfræðingur 584 atkvæði sem fyrsta val
17. Erlingur sigurðarson fv. forstöðumaður Húss skáldsins og kennari við MA 526 atkvæði sem fyrsta val
18. Arnfríður Guðmundsdóttir prófessor 531 atkvæði sem fyrsta val
19. Katrín Oddsdóttir lögfræðingur 479 atkvæði sem fyrsta val
20. Inga Lind Karlsdóttir fjölmiðamaður og háskólanemi 493 atkvæði sem fyrsta val
21. Guðmundur Gunnarsson formaður Rafiðnaðarsambands Íslands 432 atkvæði sem fyrsta val
22. Katrín Fjelsted læknir 418 atkvæði sem fyrsta val
23. Ástrós Gunnlaugsdóttir nemi, stjórnmálafræðingur 396 atkvæði sem fyrsta val
24. Gísli Tryggvason talsmaður neytenda 348 atkvæði sem fyrsta val
25. Lýður Árnason læknir, kvikmyndagerðamaður 347 atkvæði sem fyrsta val 

Landhelgisgæslan fór í ískönnunarflug í morgun og var hafís kannaður á radar kl. 10:52. Myndin sýnir útlínur megin jaðarsins sem lá næst landi 47 sml. VNV af Straumnesi. Af radarmyndum að dæma er um að ræða frekar gisin ís en þó eru sennilega stakir jakar inn á milli.

Hafísinn hefur nálgast.

Samkvæmt radsjármyndum sem teknar voru um hádegið í gær og Ingibjörg Jónsdóttir hjá Jarðvísindastofnun Háskóla Íslands sendi vefnum,hefur ísinn heldur þokast nær landi nú í Vestanáttinni sem var í gær og í fyrradag,og er Vestlægri átt spáð áfram fram á fimmtudag í það minnsta.

Að sögn Ingibjargar er ísinn mjög gisinn næst landi og er um 40 sjómílur í hann NV af Straumnesi.

Þjóðfræðistofa verður með opið hús í Skelinni á Hólmavík þriðjudaginn 30. nóv. milli kl. 18.00 til 20.00. Þema þessa viðburðar er svæðisbundin matarmenning. Henry Fletcher fjallar stuttlega um sitt sérsvið: fæðuöflun í náttúrunni og eru heimamenn hvattir sérstaklega til að koma og kynna sína heimaframleiðslu s.s. sultur, kleinur, lambakjöt, reykta rauðmaga, harðfisk, kæfu og jafnvel jólasmákökur.   Á boðstólnum verður m.a. fiskisúpa, heimabakað brauð og kaffi á 1500 kr.  Allir eru velkomnir!  Frekari upplýsingar veitir Katla Kjartansdóttir í síma 8654463.
Nánar á vef Þjóðfræðistofu. 

Í vikunni sem var  að líða sinnti lögregla venjubundu eftirliti, ásamt því að fara í eftirlit með þyrlu landhelgisgæslunnar s.l. laugardag.  Flogið var yfir þekkt veiðisvæði í umdæminu. Fáir veiðimenn voru að ferðinni.  Rætt var við einn veiðimann á fjöllum og var hann með réttindi og annað í lagi.     

Þá var rætt við ökumenn vegna ljósabúnaðar og nokkrir aðilar boðaðir með bifreiðar sínar til skoðunar. Að öðru leiti var umferð með rólegra móti og engin umferðaróhöpp tilkynnt til lögreglu. Skemmtanahald fór vel fram og án teljandi afskipta lögreglu.
Segir í yfirliti lögreglu á Vestfjörðum.

Það kom fram í hádegisfréttum Ríkisútvarpsins að Flugfélaginu Erni hefur verið tilkynnt að ríkisstyrkur vegna flugs félagsins til Sauðárkróks falli niður um áramót. Gangi það eftir segir framkvæmdastjóri félagsins að flugi þangað verði sjálfhætt. og jafnframt myndi félagið hætta áætlunarflugi til Bíldudals og Gjögurs. 

Flugfélagið Ernir flýgur áætlunarflug til fimm staða - Bíldudals, Gjögurs, Sauðárkróks, Hafnar í Hornafirði og Vestmannaeyja. Allar hafa þessar flugleiðir verið ríkisstyrktar nema Vestmannaeyjar. Vegagerðin hefur nú tilkynnt Flugfélaginu Erni að frá og með áramótum hætti ríkið stuðningi við flug félagsins til Sauðárkróks, enda hafi ríkisstuðningur á þeirri leið ekki síst verið til þess að tryggja betur samgöngur við Siglufjörð. Með opnun Héðinsfjarðarganga séu forsendur breyttar.

Hörður Guðmundsson, framkvæmdastjóri Flugfélagsins Ernis, sagði í viðtali við Rúv, að verði ríkisstyrk vegna Sauðárkróksflugsins hætt um áramót hætti félagið flugi þangað. Allt útlit sé til að svo verði.

Leggist Sauðárkróksflugið af sagði Hörður ennfremur að forsendubrestur yrði í rekstrinum og óhjákvæmilegt yrði að hætta einnig flugi á áfangastaði félagsins á Vestfjörðum. Þá yrði það Bíldudalur, Gjögur og Sauðárkrókur sem myndu detta út.

Flugfélagið Ernir á nú í viðræðum við samgönguráðuneytið um málið.
Fréttin á Rúv.

Kjörstaður í Árneshreppi vegna kosninga til stjórnlagaþings á morgun 27.nóvember 2010 verður í Félagsheimilinu í Trékyllisvík og verður opnaður klukkan 10:00.

Á kjörskrá eru alls 44 sem skiptast eftir kynjum svo,karlar 26 og konur eru 18,sem hafa kosningarétt í Árneshreppi vegna stjórnlagaþings.

Einum fleira er á kjörskrá nú en í síðustu kosningum,það er sveitarstjórnarkosningum 29.maí 2010.

Kjörskrá Árneshrepps liggur fyrir á hreppsskrifstofu sveitarfélagsins til kjördags.

Formaður kjörstjórnar er Ingólfur Benidiktsson í Árnesi II.

Nú í dag kom Kristján Guðmundsson hjá Strandafrakt að sækja ull til bænda.

Ullin kemst ekki í einni ferð og var tekin ull hjá bændum sem voru búnir að flokka ullina.

Restin af ullinni verður sótt til bænda þegar hún er tilbúin,og þegar veður og færð leyfir,nokkrir bændur eiga eftir að rýja ennþá

Ullin fer í Ullarþvottstöð Ístex á Blönduósi.

Eins og fram hefur komið hér á vefnum hækkaði verð til bænda fyrir ullina um tæp 9 prósent á milli ára.

Aðalfundur Félags Árneshrepps verður haldinn sunnudaginn 28.nóvember 2010.

Fundurinn verður haldinn í Akoges-salnum í Lágmúla 4 Reykjavík.

Dagskráin er þessi:

1.Venjuleg aðalfundarstörf.

2.Önnur mál.

Að loknum aðalfundi verða kaffiveitingar verðið er 2000 kr.

Að venju verður myndasýning á meðan á kaffiveitingum stendur.

Félagið fagnaði 70 ára afmæli á árinu.

Formaður Félags Árneshreppsbúa er Kristmundur Kristmundsson frá Gjögri.

Félag Árneshreppsbúa er á Facebook og er slóðin þessi:

http://www.facebook.com/profile.php?id=100000365859044&ref=profile#!/pages/Felag-Arneshreppsbua/332432259816