Fjórir aðilar hafa sent Náttúrufræðistofnun erindi þar sem óskað er eftir því að fá hvítabjörninn nýskotna til varðveislu og þar af þrír á Vestfjörðum: Umhverfisstofnun fyrir gestastofu á Hornströndum, Núpur í Dýrafirði og Melrakkasetrið í Súðavík. Sá fjórði er í Fljótum í Skagafirði. „Það væri mjög gaman ef við fengum hann hingað til okkar," segir Jón Björnsson, forstöðumaður Hornstrandastofu aðspurður um málið. Ferðaþjónustubóndinn og kokkurinn Guðmundur Helgi Helgason á Hótel Núpi segist hafa heyrt að aðili utan Ísafjarðarbæjar hafi sóst eftir að fá að geyma dýrið og því hafi þeir ákveðið að sækja um að varslan kæmi í þeirra hlut. „Við gátum ekki hugsað okkur að dýrið færi annað, hann var skotinn hér og á því að vera í Ísafjarðarbæ."Segir Guðmundur við BB.ís
Nánar hér á Bæarins Besta.

Mikið hefur rignt í nótt og í morgun og enn rignir mikið.

Úrkoman mældist 34,0 mm á veðurstöðinni í Litlu-Ávík frá kl.18:00 í gær og til kl.09:00 í morgun.

Mun þetta vera næstmesta úrkoma sem mælst hefur þar eftir 15 tíma,síðan mælingar hófust þar 1995.

Og var þetta næstmesta úrkoma sem mældist á landinu í nótt en mest var hún í Vík í Mýrdal 36,9 mm.

Jörð er á floti og margir nýir lækir myndast.

Það mun draga úr úrkomu í dag eftir veðurspá Veðurstofu Íslands.

Smiðir hafa verið í þessari viku að laga og eða endurbyggja sumarhúsið hans Kristjáns Andra Guðjónssonar sem skekktist til á grunni og þak fauk af því í roki þann 10. apríl síðastliðin.

Húsið var upphaflega byggt síðastliðið haust,og var finnskt bjálkahús um 24 fermetrar að stærð.

Smiðirnir Jón Gíslason og Guðmundur Sigurðsson hafa verið að rétta húsið af setja nýtt þak og járn.

Allt efni í sperrur og borð í klæðningu á þak var sagað í Litlu-Ávík.

Húsið er í Steinstúnslandi sem nefnist Giljapartur rétt fyrir ofan Sýkið í Norðurfirði.

Slysavarnafélagið Landsbjörg í samvinnu við marga aðila í ferðaþjónustu, meðal annars Ferðamálastofu, opnaði nýlega endurbættan safetravel-vef.

Á vefnum má finna margt sem ferðaþjónustuaðilar geta nýtt sér til að veita gestum sínum góðar upplýsingar um öruggari ferðalög á Íslandi. Mikið af efni sem tengist öryggis- og forvarnarmálum ferðamanna má finna á síðunni en meðal annars má benda á góða útbúnaðarlista fyrir ýmsar tegundir ferða, sprungukort fyrir jökla sem hala má niður eða prenta út svo og geta ferðamenn skilið eftir ferðaáætlanir sínar á vefnum.

Það er von Slysavarnafélagsins Landsbjargar að ferðaþjónustuaðilar eigi eftir að nýta sér þennan vef vandlega og bendi starfsmönnum sínum á slíkt hið sama enda má þar finna svör við fjölmörgum spurningum ferðamanna.

Slóðin er á: www.safetravel.is

Hafísjaðarinn hefur ekki verið mjög nærri landinu að undanförnu. Því getur allt eins verið að hvítabjörninn sem sást í Hælavík í morgun hafi ekki verið nýkominn, að mati Ingibjargar Jónsdóttur landfræðings hjá Jarðvísindastofnun. Einnig er mögulegt að bjarndýrið hafi synt langa leið til Íslands en hvítabirnir eru mjög vel syndir.

Sérfræðingar Jarðvísindastofnunar Háskóla Íslands, Siglingastofnunar og Hafrannsóknastofnunar eru nú að skoða hvernig aðstæður hafa verið í hafinu norðan við Ísland að undanförnu til að leita skýringa á komu hvítabjarnarins til Hornstranda.

Ingibjörg Jónsdóttir, dósent við Jarðvísindastofnun HÍ, sagði við vef mbl.is,að hún ásamt Héðni Valdimarssyni hjá Hafrannsóknastofnuninni og Eysteini Má Sigurðssyni hjá Siglingastofnun hafa verið að rekja sig aftur í tímann hvað varðar legu ísjaðarsins og mögulegt rek hafíss norðan landsins.
Nánar hér á www.mbl.is
 

Eftir því sem kemur fram á vef Landhelgisgæslunnar var Hvítabjörninn felldur í Rekavík (Bakhöfn) á Hornströndum kl. 14.21.

Tilkynning barst Landhelgisgæslunni í morgun um hvítabjörn í Hælavík á Hornströndum. Þyrla Landhelgisgæslunnar flaug á Ísafjörð þaðan sem flogið var á Hornstrandir í Hælavík. Þegar þangað var komið hafði dýrið fært sig um set og fannst eftir nokkra leit í Rekavík (Bakhöfn). Þoka var í efstu brúnum og var mikil yfirferð á dýrinu. Lögreglan á Ísafirði var með í för og mat aðstæður þannig að ómögulegt væri að vakta dýrið allan sólarhringinn á svæðinu og tryggja þannig að það færi ekki í sjó eða flytti sig um set í átt að byggð. Því var tekin ákvörðun um að fella dýrið af öryggisástæðum.

Unnið var í samræmi við viðbragðsáætlun um viðbrögð við landtöku hvítabjarna. Lögreglan á Ísafirði stjórnaði aðgerðum og með í för voru fulltrúar Umhverfisstofnunar, fulltrúi yfirdýralæknis ásamt reynslumiklum skyttum. Ísbjarnarhræið var flutt með þyrlunni til Ísafjarðar og verður flutt til Reykjavíkur þar sem Náttúrufræðistofnun Íslands mun taka við dýrinu og rannsaka.
Nánar á vef Landhelgisgæslunnar.

Áhöfn fiskibáts sá ísbjörn í Hælavík á Hornströndum um klukkan níu í morgun og tilkynnti um hann. Landhelgisgæslan hyggst fljúga yfir svæðið innan tíðar.

Uppsetning Leikfélags Hólmavíkur á hinum sprellfjöruga gamanleik  „Með táning í tölvunni" eftir Ray Cooney hefur fengið fádæma góða aðsókn. Það er heimamaðurinn Arnar S. Jónsson sem leikstýrir og fara sjö leikarar með hlutverk í sýningunni og eru flestir þeirra að stíga sín fyrstu skref með leikfélaginu. Auk þeirra tekur annar eins fjöldi þátt í verkefnum á bak við tjöldin. Þrjár sýningar voru á Hólmavík um páskahelgina og þegar hafa rúmlega 300 hundruð manns séð sýninguna, sem lætur nærri að sé 80% af íbúafjölda á staðnum. Búið er að ákveða að næstu sýningar verði á Hólmavík laugardagana  7. maí og 21. maí og hefjast þær báðar kl 20. Þá er áformað að sýna á Patreksfirði, Þingeyri og Bolungarvík rétt fyrir sjómannadag og enda svo á sýningu í Árneshreppi kringum 17. júní. Leikfélagið á 30 ára afmæli á þriðjudaginn og auk þessarar uppfærslu er ætlunin að minnast afmælisins með fjölbreyttum hætti síðar á árinu.

Fréttatilkynning: 

Afar fjölsóttur fundur um atvinnumál á Vestfjörðum var haldinn á Ísafirði laugardaginn 30 apríl.  Fundinn sóttu um 150 manns víðsvegar að af Vestfjörðum.  Að fundinum stóðu verkalýðsfélög og atvinnufyrirtæki á svæðinu, til að vekja athygli á alvarlegri byggðaþróun á Vestfjörðum.  Framsögumenn fjölluðu um tækifæri, aðstæður og samkeppnisskilyrði atvinnufyrirtækja og leiðir til úrbóta.  Ráðherrarnir Jón Bjarnason og Ögmundur Jónasson, sátu fyrir svörum auk Guðna A Jóhannessonar, orkumálastjóra sem var fulltrúi iðnaðarráðherra.  Auk þeirra voru fulltrúar viðskiptabankanna, Fjárfestingarsjóðs Íslands og Orkubús Vestfjarða.

Fram kom í máli innanríkisráðherra að hann hefði skipað starfshóp undir forystu Guðmundar Kristjánssonar, hafnarstjóra á Ísafirði til þess að koma fram með tillögur um strandsiglingar. Var því vel tekið af fundarmönnum.  Auk þess lýsti ráðherra því yfir að mest væri þörfin fyrir samgönguframkvæmdir á Vestfjörðum og Austfjörðum og ættu framkvæmdir þar að njóta forgangs að vegafé.  Jón Bjarnason, sjávarútvegsráðherra, lýsti því yfir að fyrirhugaðar breytingar á löggjöf í sjávarútvegi ættu að styrkja stöðu strandveiða og að aukin byggðatenging og byggðafesta myndu styrkja samkeppnisstöðu sjávarbyggða. 

Meira

Nú í dag hóf Strandafrakt áætlunarferðir með flutningabíl frá Reykjavík Hólmavík-Norðurfjörður.
Bíllinn fer úr Reykjavík á þriðjudögum og þann dag til Hólmavíkur og til Norðurfjarðar á miðvikudögum.
Þessar ferðir standa út október.
Í maí var Strandafrakt búin að koma að sækja grásleppuhrognatunnur.
Eins og í fyrra kemur póstur með bílnum á miðvikudögum,því nú er aðeins flogið á mánudögum á Gjögur í sumar eins og fram hefur komið hér á vefnum.