Mikill niðurskurður fjárveitinga blasir við á HVE. Heilbrigðisstofnun Vesturlands.skv. boðuðu fjárlagafrumvarpi og vegna umtalsverðs rekstrarhalla á þessu ári. Aðgerðaráætlun framkvæmdastjórnar liggur í meginatriðum fyrir. Fjárlagafrumvarp ársins 2012 gerir ráð fyrir um 95 m.kr. niðurskurði samanborið við fjárlög árið 2011. Þá mun rekstur þessa árs að öllu óbreyttu skila neikvæðri afkomu sem getur numið um 80 m.kr. sem taka þarf tillit til við gerð rekstraráætlunar. Því þarf að gera ráð fyrir umtalsverðum rekstrarhalla til viðbótar á næsta ári miðað við svipaða starfsemi. Að öllu óbreyttu er ljóst að stofnunin mun því þurfa að stefna að niðurskurði sem nemur allt að 250 millj. króna, eða um 8,5% af rekstri. Viðræður standa yfir við ráðuneyti um ásættanlega leið svo koma megi til móts við niðurskurðarkröfur stjórnvalda hvað varðar rekstur stofnunarinnar á næsta ári. Heilbrigðisstofnun Vesturlands nær yfir Akranes, Borgarnes, Búðardal, Grundarfjörð, Hólmavík, Hvammstanga, Ólafsvík og Stykkishólm, með höfuðstöðvar á Akranesi.Þetta kemur fram í fréttatilkynningu frá HVE.

Umferð í liðinni viku gekk nokkuð vel fyrir sig. þó voru tvö umferðaróhöpp tilkynn til lögreglu, annað þann 18. okt., þá var ekið aftan á bifreið á Hafnarstræti við hringtorgið á Ísafirði og hitt óhappið varð í Vestfjarðargöngunum 20. okt., um minniháttar óhapp var þar um að ræða.

Einn ökumaður var kærður fyrir ölvun við akstur.

Einn ökumaður var stöðvaður fyrir of hraðan akstur  á Vestfjarðarvegi í Tungudal.  Aðfaranótt s.l. mánudags þurfti að kalla út björgunarsveitina Lónfell á Barðaströnd til aðstoðar ökumanni á Klettshálsi, sem þar var í vandræðum vegna ófærðar.

 

Meira

Ferðalok er titill sem Reimar Vilmundarson notar á vefsíðu Freydísar síðu um strandferðir Sædísar,vegna ákvörðunar sinnar um að vera ekki með farþegaflutninga á Sædísi ís 67 næsta sumar.Til skoðunar er að bjóða upp á flutning á vörum (trússi) ef eftir verður óskað.
14 ár eru liðin frá því að Reimar fór fyrstu ferðir með farþega í atvinnuskyni, síðan þá eru ferðirnar orðnar margar bæði frá Bolungarvík sem og Norðurfirði. Í þessum ferðum hefur hann kynnst miklum fjölda af skemmtilegu fólki innlendu sem erlendu og átt gott samstarf við marga.Vill Reimar hér með koma á framfæri þökkum til þeirra sem og samstarfsmanna og aðila sem hafa verið honum samferða í gegnum árin.

Einnig sagði Reimar í viðtali við fréttamann Litlahjalla að hann myndi ekki verða með ferðir á Hornstrandir frá Bolungarvík eins og hann var að hugsa um í sumar þegar hann ákvað að þetta yrði síðasta sumarið sem hann sigldi frá Norðurfirði með ferðafólk á Strandir,nú væru þessum þætti lokið af hans hálfu!

Kvennakórinn Norðurljós frá Hólmavík heldur tónleika í Árbæjarkirkju í Reykjavík á morgun laugardag 22. október. Hefjast tónleikarnir kl. 14.00 og er miðaverð 2000 krónur og posi á staðnum. Létt efnisskrá og gleði við völd. Stjórnandi kvennakórsins Norðurljósa er Sigríður Óladóttir og undirleikarar Viðar Guðmundsson og Gunnlaugur Bjarnason. Strandamenn syðra eru hvattir til að fjölmenna á skemmtilega tónleika.

Nýlega var haldin samkeppni um kennimerki „lógó" félagsþjónustu Stranda og Reykhólahrepps og voru þó nokkuð margar tillögur sendar inn. Valið var erfitt þar sem allar tillögurnar voru vandaðar, hugmyndaríkar og skemmtilegar. Hins vegar þarf alltaf að velja eina og bar Friðlaugur Jónsson sigur úr býtum. Tillaga hans var með skírskotun í galdratákn og byggðasögu svæðisins með nútímalegri nálgun. Upphafsstafir Félagsþjónustu Stranda og Reykhóla (FSR) er í kennimerkinu auk þess sem 4 hlutar mynda þau fjögur sveitarfélög sem standa að félagsþjónustunni en það eru Árneshreppur, Kaldrananeshreppur, Reykhólahreppur og Strandabyggð. Græni hlutinn táknar notendur félagsþjónustunnar.

 

Friðlaugur er fæddur og uppalinn á Ísafirði en býr í Reykjavík í dag. Hann útskrifaðist sem grafískur hönnuður frá Myndlistakólanum á Akureyri árið 2008. Hann hefur unnið á hinum ýmsu auglýsingastofum og grafísku vinnustofum auk þess sem hann sá um umbrot og útgáfu sjónvarpsvísisins Almanaks við annan mann um tveggja ára skeið. Í dag starfar hann hjá tölvuleikjafyrirtækinu Fancy Pants Global í Kópavogi sem sérhæfir sig í leikjum og forritum fyrir snjallsíma og töflur. Skemmst er frá því að segja að hann sigraði einnig merkjasamkeppni sem haldin var í vor á vegum Snjóflóðaseturs Veðurstofu Íslands fyrir SNAPS verkefnið. Heimasíða höfundar er: www.frilli7.com

Meira

Vestfirskir listamenn&lífskúnstnerar er heimildaverkefni. Verkefnið byggist upp á ljósmyndum og mjög stuttum texta um listamenn og lífskúnstnera. Ljósmyndin verður tekin í vinnustofu eða vinnu umhverfi, svokölluð umhverfisportrett. Verkefninu er ætlað að halda utan um brot úr vestfirskri menningu eins og hún er 2011-2012. Það sem viðkomandi þarf að hafa gert til að falla undir þennan titil sem á verkefninu er, er að hafa gert list eða menningarverkefnum skil og vera sýnilegur á einhvern hátt, eins og t.d sýningar á verkum sýnum eða sýnilega aðkomu að góðum verkefnum. Eiginlega fellur öll menningartengd ferðaþjónusta undir þessa skilgreiningu. Þegar hafa Spessi(Sigurþór Hallbjörnsson) ljósmyndari, Elfar Logi Hannesson leikari, Marsibil Kristjánsdóttir og Matthildur Helgadóttir listakonur og Sigurður Atlason lífskúnstner samþykkt að taka þátt í verkefninu. Verkefnið er styrkt af Menningarráði Vestfjarða.

 Áætlað er að 30 viðfangsefni verði í verkinu.  Listamönnum&lífskúnstnerum verður bæði boðin þátttaka og einnig er hægt að benda á sjálfan sig ef viðkomandi finnst hann hafa það til bruns að bera sem þarf til að vera með í verkefni sem slíku. Tilnefningar af öðrum eru líka mjög vel þegnar. Verkefnið mun fá eigin vefsíðu og ljósmyndasýningu sem mun verða hengd upp í helstu bæjarkjörnum Vestfjarða, svokölluð farandsýning. Ef vel heppnast til, og allt gengur upp verður verkefnið sett í bók.

Meira

Leikfélag Patreksfjarðar frumsýnir leikritið Tíu þjónar og einn í sal  28. október 2011 kl. 20.00 í Félagsheimili Patreksfjarðar.

Önnur sýning  29. október kl. 20.00 og fleiri sýningar verða auglýstar ef eftirspurn verður fyrir hendi.

Leikhúsgestir fá þriggja rétta máltíð sem hinn frábæri Sælkerahópur á Patreksfirði mun sjá um að elda. Leikarar sjá um þjónustu. Ýmsar uppákomur og atriði verða á meðan á máltíð stendur þar sem þjónustufólk sýnir á sér ýmsar hliðar sem fólk á kannski ekki að venjast svona yfir höfuð þegar það fer út að borða. Barinn verður opinn.

Höfundar:  Ingrid Jónsdóttir og leikhópurinn.
Leikarar: Bjarnveig Guðbjartsdóttir,  Eiríkur Þórðarson, Fríða Sæmundsdóttir, Gestur Rafnsson, Hrannar Gestsson, Jóhanna Gísladóttir, María Ragnarsdóttir, Ólöf Þórðardóttir, Skjöldur Pálmason, Stefanía Árnadóttir og Valgeir Ægir Ingólfsson.
Leikstjórn: Ingrid Jónsdóttir. Forsala aðgöngumiða í síma 866-6822.

Athugið að það er MJÖG ÁRÍÐANDI að panta miða fyrir 25. október, helst fyrr.Takmarkaður sætafjöldi.

Verð: 5.500 Athugið að miða þarf að borga og sækja fimmtudaginn 27. október í Félagsheimili Patreksfjarðar frá kl. 19.00 - 20.00.

Fréttatilkynning:

Laugardaginn 3 desember verða stofnuð samtök áhugafólks  um „Hreindýr á Vestfirði" .Tilgangur samtakanna er að beita sér fyrir því að gerðar verði rannsóknir á heilbrigði hreindýranna, það er að segja hvort hætta sé á að þau geti smitað sauðfé af búfjársjúkdómum. Einnig að gerð verði rannsókn á gróðurfari á Vestfjörðum í þeim tilgangi að athuga hvort nægjanlegt æti sé fyrir dýrin. Félagsmenn geta þeir orðið sem eiga lögheimili á Vestfjörðum, eiga þar fasteignir eða jarðir.Þeir sem vilja gerast félagsmenn í samtökunum skrái sig sem allra fyrst á  hreindyr@skotvis.is.   Á stofnfundi samtakanna verður kosin stjórn þeirra, skipað í starfshópa og lög samtakanna rædd og síðan borin upp til samþykktar. Fundarstaður hefur en ekki verið ákveðinn en líkur eru þó á að fundurinn verði haldinn á Hólmavík.

Fyrsti fyrirlesturinn í röð fyrirlestra um náttúru Vestfjarða verður sendur út í fjarfundi á morgun, fimmtudaginn 20. október kl 17-18. Fjallað verður um Atferli dýra og það er Þorleifur Eiríksson dýrafræðingur og forstöðumaður Náttúrustofu Vestfjarða sem flytur þennan fyrsta fyrirlestur. Verður hann aðgengilegur í fjarfundi bæði í Þróunarsetrinu á Hólmavík og Reykhólaskóla. Náttúrustofa Vestfjarða, Rannsóknasetur Háskóla Íslands á Vestfjörðum og Fræðslumiðstöð Vestfjarða gangast fyrir þessari röð alþýðlegra fyrirlestra um náttúrufræðileg efni. Fyrirlestrarnir verða bæði um þær rannsóknir sem nú eru stundaðar á Vestfjörðum og almennt um náttúrufræðileg efni. Fyrirlestrarnir verða sendir út í fjarfundabúnaði þannig að þeir sem hafa aðgang að slíkum búnaði geta nýtt sér þá. Fyrirlestrarnir verða að jafnaði þriðja fimmtudag í mánuði kl. 17:00-18:00.
Skráning er á slóðinni http://www.frmst.is/index.php/namskeid/texti/natturan_atferli_dra/

Flugfélagið Ernir flugu á Gjögur í dag,en ekki var hægt að fljúga í gær vegna óveðurs.Í dag eftir hádegið var komið hið besta veður með Suðvestan golu og hita um frostmark og mest háský á lofti.

Vegagerðin á Hólmavík hreinsaði veginn frá Bjarnarfirði og norður í Árneshrepp í morgun og er vegurinn greiðfær en hálkublettir á stöku stað.